Tuesday, February 4, 2014

කෙලි සෙල්ලම්

"මේ අවස්ථාවේදී පන්දුවට වැරෙන්  පහරක් එල්ල කරනවා.."

ක්‍රිකට් ගහන්න කව්රුත් නැති දවස් වල බොලේ දාගන්නේ බිත්තියට කියල.. මන්ම දාන බොලේ ආයි එනකොට තමයි ගහන්නේ.. ඔය ගමන් ඉතින් මගේම විස්තර විචාරයකුත් යනවා..

 "ස්ලාන් බ්ලාන් ස්ලාන්.."

ගහපු පාර ගියේ ගෙදර ඉස්සරහ ජනේලේ වීදුරුවත්  කඩාගෙන.. මට බැට් එකත් අත ඇරුනේ කෙල ගුලියකුත් ගිලෙන ගමන්.. තාත්ත වැඩ ඇරිලා එන්න තව පැයයි තියෙන්නේ.. දුවල ගිහින් ගෝනියක් අරන් ඇවිත් වැටිච්ච කටු ටික අස්  කරන්න ගත්ත..

"බින්ද නේද ජනේලේ.. තාත්ත ආවම බේරාගන්නවා දැන් ඉතින්.."

කෙල වෙලා ඉන්න වෙලාවට අම්මත් එනවා තව බය කරන්න..

බිඳුණු කෑලි ටික අස් කරලා පූසා වගේ ඇඳටම වෙලා හිටිය තාත්ත එනකන්.. වෙනද ගේට්ටුව අරින සද්දේ ඇහුන ගමන් පෙරලගෙන දුවන්නේ තාත්ත කන්න අරන් එන ටික අර ගන්න.. කොහොමත් අද කන්න වෙන නිසා ඇඳටම වෙලා හිටියේ නිදි වගේ.. කාමරේ ඉන්න ගමන් සාලේ දිහාවට කන දාගෙන හිටියේ කොයි වෙලේ වැඩේ පත්තු වෙයිද කියල..

පැයක්  දෙකක් ගියත් කිසි වෙනසක් නෑ.. සමහරවිට කරුවල නිසා දැක්කේ නැද්ද දන්නෙත් නෑ.. කොහොම උනත් රෑ ජනෙල් වහන්න යද්දී නම් කොහොමත් දකිනවා.. ඇඳේ එහෙමම නින්ද ගිය මට ඇහැරුනේ පහුවද උදේ.. එකත් හොඳට ගියා.. තාත්තගේ අමුත්තකුත් නෑ වගේ.. නොදැක ඉන්නත් හේතුවකුත් නෑ..

කොහොම හරි වීදුරුව බිඳුණු එක ගැන කිසිම කතාවක් කරේ නෑ.. මට ඔක්කොටම වඩා එක තමයි ප්‍රශ්නේ.. දෙකක් දුන්න නම් වැඩේ එතනින් ඉවරයි.. දැන් මට බැට් එක දිහා බලන්නත් බෑ..

කිසිම දඬුවමක් නොදීම හොඳම දඬුවම කියල තේරුනේ ටික දවසක් යද්දී..

එක දවසක් නම් මොකක් හරි කරපු මගෝඩි වැඩකට පශ්චාත් භාගය හරහා එල්ලුන තාත්තගේ පා පහර මට තාමත් මතකයි.. කරපු වැරැද්ද මොකද්ද කියල නම් මතකයක් නෑ..

පුංචි කාලේ ඉස්කොලේ ගිහින් ගෙදර ආවම අත්තම්ම එක්ක පාඩම් කරන එක මට නම් එපා වෙච්ච දෙයක්.. කොච්චර පාඩම් කරත් අත්තම්මට මදිනේ.. කොහොම උනත් හවස සෙල්ලම් කරන්න යන්න ඕනේ දවසට පේන්නත් එක්ක පොඩ්ඩක් වැඩියෙනුත් එක්ක වැඩ කරනවා.. නැත්තම් උන්දැගෙන් අවසරේ ගන්න වෙන්නේ නෑ..

සමහර දවස් වල ඒ අවසරේ ලැබෙන්නෙත් නෑ.. එහෙම උනාම ඉතින් තාත්ත ගාවට ගිහින් පොඩ්ඩක් අඬල සෙල්ලම් කරන්න යන්නද කියල අහල හා කිව්වම අත්තම්මට කොචොක් පාරකුත් දාගෙනම තමා සෙල්ලමට යන්නේ..

එහෙම දවසට ඉතින් අම්ම ආපු ගමන් කියනව කේලම.. ගොඩක් දවසට ඉතින් අම්මත් අපිව බේරනවා පොඩි උන් ඔහොම තමයි කියල..

අහල පහල හිටපු යාලුවෝ තුන් හතර දෙනක් එක්ක නොකරපු සෙල්ලමක් නෑ.. ක්‍රිකට්, අයි ස්පයි, අල්ලන් සෙල්ලම්, බයික් පැදිලි වගේම මීටර් 100, මැරතන් එහෙමත් දිව්වා..

තවත් දවසක තුවක්කු ටිකක් අරන් කැලේ පැන්නෙ යුද්ද සෙල්ලම් කරන්න.. හති වැටෙනකන් සෙල්ලම් කරලා ගෙදරට එන්නේ ජරා ජීර්ණ වෙච්ච ශරීරයකුයි අලුතින් පීදුණු මනසකුයි එක්ක..

අපේ ළමා කාලේ ගෙවිලා යද්දී අපි සෙල්ලම් කරපු කැලෑ, පාරවල් බාර ගන්න කව්රුත් හිටියේ නෑ.. හිටියත් එහෙම එකමුතුවක් ඕනෙකමක් තිබ්බෙත් නෑ..

එලියට පහලට බැහැල සෙල්ලමක් කරපු අන්තිම පරපුර අපිද මන්ද.. වෙලාවකට අපිත් දැන් වෙනස් වෙලාද කියල හිතෙනවා.. ඉඩක් ලැබුණු වෙලාවක මොනවා හරි කරලා ජීවිතේට වෙනසක් ගන්නේ ඒ වෙනස ජීවිතේට ඕනේ නිසා.. කොහොම හරි හිතල පොස්ට් එකක් දැම්මේ නිදහස් දවසෙත් නිදහසක් නෑ කියල කියන්න බැරි හන්ද.. 



Monday, July 22, 2013

අම්මා කියූ කවි..

සති ගානක් කපන්න හිටපු කොන්ඩෙ අදවත් කපාගන්න කියලා හන්දියට ගියාට මොකද එක සැලෝන් එකක්වත් නෑනේ.. අද ඇසළ පෝය නිසා වගේම උදේ වැටුණු මහා වැස්සට උන්දැලට එළියටවත් බහින්න හිතක් නැතුව ඇති..

හන්දිය  පුරා ඇවිදලා කොහොමහරි ඇරපු සැලෝන් එකක් හොයා ගත්තා..


සැලෝන් එකක් කිව්වට එකේ හැරෙන්නවත් ඉඩක් නෑ.. කොහේ ගියත් කපන්නේ කොන්ඩෙනේ කියල මාත් ගිහින් ඉඳ ගත්ත.. කොන්ඩෙ කපන මැෂින් එකයි, කතුරයි, පනාවයි, වතුර විදිනයි පැත්තකින් හඬ දුන්න වයර්ලස් එකක් ඇරුනම වැඩි දෙයක් එකේ තිබ්බේ නෑ..


කොහොම හරි කොන්ඩෙ කපන අතරතුර මම හිටියේ වයර්ලස් එකට කන ඔබාගෙන.. පෝය දවස නිසාද මන්ද බොහොම පැරණි ගීත කීපයක්ම විකාශණය වුණා.. ඔය අතරේ අරිසෙන් අහුබුදු ශුරීන් විසින් රචිත ආර්. මුත්තුසාමි සහ සුනිල් ශාන්තයන් සංගීතවත් කල ධර්මදාස වල්පොල ශුරින් විසින් ගායන කරන ලද "කටේ කිරි සුවඳ යන්නද පවා බැරි උනා.." ගීතය විකාශණය උනේ මගේ මතකය ඈතට ගෙන යමින්...


මම මේ කියන්න යන කාලේ අපේ මලයන්ඩි හිටියේ නෑ.. මමයි නංගියි තමයි රජ කරේ.. ඉතින් ඔය කාලේ රෑට නිදා ගත්තේ මමයි තාත්තයි එක කාමරේක.. නංගියි අම්මයි තව කාමරේක.. ඒත් තාත්ත නිදියන්න පහු වෙන නිසා අම්මයි නංගියි මගේ ඇඳට ඇවිත් මව නිදි කරවල තමයි එයාලගේ කාමරේට යන්නේ.. 


මේ තමයි මගේ දවසේ හොඳම කාලය.. නින්ද යනකන් කතාවක්, සින්දුවක්, කවියක් කීම අම්මාට අනිවාර්ය දෙයක්.. නැත්තන් මන් එහෙම නෙමේ නිදියන්නේ.. 


මනමේ, නරිබෑනා, සිංහබාහු කතා කිව්වේ ඒ නාට්‍ය වල ගීත එක්කම.. මට ඒවා අහලම කටපාඩම්.. ඔය අතරේ අම්ම ළඟ නිදියන්න මමයි නංගියි පොර කනවා.. 


නංගි පොඩි එකානේ කියල හැමදාම එයා අම්ම ගාව.. සමහර දවස් වල අම්ම නංගිව වැඩකට යවල මව ගන්නවා ලඟට.. එත් එයා ආපු ගමන් කොහොම හරි රිංගනවා මැදට.. 


අම්ම කියන්න ගන්නවා මෙහෙම කවියක්.. 


මුනි සිරිපා සිඹිමින්නේ...

සමනොල ගිර පෙදෙසින්නේ...
මඳ සුළඟයි මේ එන්නේ...
මගේ පුතා නැලවෙන්නේ...

ඕක අහපු ගමන් නංගි පටන් ගන්නවා කෙකර ගාන්න.. අම්ම අන්තිම පදේ "මගේ දුවා නැලවෙන්නේ..." කියල වෙනස් කරන්නේ නංගිව නලව ගන්න.. 


ඉතින් ඔය වගේ දවස් වල අම්ම නිතර කියපු මම ගොඩක් ආස කරපු ගීතයක් තමයි  "කටේ කිරි සුවඳ යන්නද පවා බැරි උනා.." ගීතය.. කොන්ඩෙ කපන අතරතුර මාව අතීතයට යැවුනේ ඔය විදියට... 


මෙන්න සම්පූර්ණ ගීතය.. 


කටේ කිරි සුවඳ යන්නද පවා බැරිවුණා 

යුධට උපන් කුමරිඳු යයි නමක් ඇති වුනා
මුල්ලේරියා වෙලේ වතුර ලෙයට හැරවුණා
ටිකිරි කුමරු රාජසිංහ නමින් රජවුණා


නිතර නිතර සීතාවක රණබෙර නැඟුනා

කොළඹ කොටුවේ බළල් මසුත් ගිනි ගනන් වුනා
පරංගි දේසේ රජුටත් මර උණ ගැනුනා
රාජසිංහ දෙවි නාමේ ලොවේ රජ වුනා


රුසිරු පෙතන්ගොඩ උයනට අනේ ලං වුනා

නපුරු උණ කටුව පතුලේ ඇනී වන වුනා
එක්ව සිටි සැවොම මතුරා විසද වැඩි වුනා
රාජසිංහ දෙවි නාමේ ගියා නැති වුනා




කොන්ඩෙත් කපාගෙන යන ගමන් හිතුවේ කොහොම හරි මේක බ්ලොග් එකේ ලියන්න ඕනේ කියල.. 


Saturday, May 25, 2013

වෙසක් කූඩුව



අයියේ.. සව් කොළ මදිලූ.. තව ටිකක් අරන් එන්නලූ..

වෙසක් එකට හදපු කූඩු තුන අලවන්න ගෙනාපු කොළ මදිවෙලා මල්ලි කෑගහනවා ඇහුනා.. 
හවස් වෙන්න කලින් එල්ලන්නත් ඕන නිසා පයින්ම ගිය හන්දියට..
පෝය දවස නිසා එතරම් සෙනගක් නැති වුනත් හන්දියේ තොරණෙ හා දන්සලේ වැඩ කටයුතු කඩි මුඩියේ කෙරුනා.. 

තාවකාලිකව අටවා ගත්  වෙසක් බඩු කඩේට ගොඩ උනේ ආපු කාරිය කරගන්න.. 

අනේ තාත්තේ අර කූඩුවත් ගමුකෝ...

පුංචි එකියක් අම්මා, තාත්තා එක්ක කූඩු ගන්න ඇවිත්. කඩේ පුරාවට වෛවාරණ කුඩු එල්ලලා තිබුන..
සව් කොළ තෝරමින් හිටියත් හිත තවමත් පොඩි එකී ළඟ.. 
කූඩුවකින්, බකට් කීපයකින්, බලුබ් වැලකින් නොනැවතුන ඈ තවත් කූඩුවකට පොර බැදු හැටි..

අනේ තාත්තේ එක කූඩුවක් මදියිනේ..

පොඩි එකීව ලඟට අරගෙන කූඩුවක්  හදල දෙන්නත් හිතුන ඒ ඇඩිල්ලට..
හැමෝම කාර්ය බහුල වෙලා.. අඟහිඟකම් වැඩි වෙලා.. ඒ තාත්තට තව කුඩුවකට වියදම් කරන්න සල්ලි නැද්ද දන්නේ නෑනේ..ඔය කූඩුවට වියදම් කරන මුදලින් ගෙදරදී කුඩු දහයක් හදන්න පුළුවන්.. 

අපේ ගෙදර තාමත් අපිම කූඩුවක් හදල අලවල එල්ලන්නේ කඩෙන් අරන් ඇවිත් එල්ලන පහසුවට ලස්සනට වඩා වටිනා සතුටක් හිතට දැනෙන නිසා වෙන්න ඇති..
මගේ හිත අතීතයට දිව ගිහින්.. 
පුංචි කාලේ අම්මා අපට කුඩු හදන්න උගන්නපු හැටි..
අම්මට නම් ඒක කූඩු පාඩමක් නෙමේ.. ගණන් පාඩමක්..
සමචතුරස‍්‍ර, සමපාද ත්‍රිකෝණ, ඒවායේ ලක්ෂණ අපි ඉගෙන ගත්තේ පුංචි කාලේදී.. අම්මාගේ වෙසක් කූඩු  පාඩමෙන්..
කූඩුවක්  හදනවට වඩා ගොඩක් දේවල් ඒ තුලින් අපි ඉගෙන ගත්තා.. ගණිතයේ ජ්‍යාමිතිය එතරම් අපහසු නොවුනේ ඒ නිසා වෙන්න ඇති.. 

අම්මා  අපට සමතුලිතතාවය මුලින්ම ඉගැන්නුවේ මම සරුංගලය හදද්දී..
ප්‍රයෝගිකව ඉගෙන ගත් ඒ දේවල් තුලින් ගණිත විෂය  ඉගෙනීම පහසුවක් වුනා ..
අපෙන් නොනැවතුන අම්මා ගුරුවරියක් වශයෙන් මේ දේවල් පරම්පරා ගණනකට කියල දුන්නා..

අම්මා නැති අද දවසේ ඒ අඩුව යන්තමින් හරි පුරවන්න කොල්ලෝ කුරුට්ටෝ ටිකක් එකතු කරගෙන ඔවුන්ගේ දැනුමට යමක් එකතු කරන්නේ ඇගෙන් ලැබූ ඒ පන්නරය නිසාවෙනි.. 

වෙසක් කුඩුවක් එල්ලනවා කියන්නේ එක ආකාරයකින් බුදු තෙමගුළ සිහි කරමින් බුදු රජාණන් වහන්සේ උදෙසා කරන්න වූ ආලෝක පුජාවක්.. 
මේ නිසා ගෙදර හැමෝම එකතු වෙලා එක කුඩුවක් හරි හදන එක ගොඩක් වැදගත්..
කුඩුවෙන් එහාට ගිය ගොඩක් දේවල් ඒ තුලින් අපිට ගන්න පුළුවන්.. 

මහත්තයට මේ ටික විතරද ඕනේ.. 

මගේ සිතුවිලි දාමය බිඳ දමමින් කඩේ හිටපු කොල්ල ඇහුවේ මාව ඉක්මනට යව ගන්න වගේ..
ඇත්ත තමයි.. කඩේ ඉඳගෙන මේවා හිතනකොට ඒ මිනිස්සු වෙළඳාම කර ගන්නේ කොහොමද? 
අද දවස ඇතුලත පුළුවන් තරම්  විකුණා ගන්නත් එපැයි.. ආයි  මිනිස්සුන්ට කූඩු  මතක් වෙන්නේ තව අවරුද්දකින් නෙව.. 

Sunday, December 23, 2012

ඊළඟ පදය

අප නොදුටු ගණිතයේ සුන්දර තැන් බොහොමයි.. මම අද කියන්නේ ඒ වගේ පුංචි සුන්දර කතාවක්.. 
අපි පුංචි කාලේ ඉගෙන ගත්ත එක ගණිත පාඩමක් තමයි සංඛ්‍යා රටා කියන්නේ.. මේ තියෙන්නේ ඒ කාලේ අපිට දැකල හුරු පුරුදු ප්‍රශ්නයක්..
2, 4, 6, ___
මොකද්ද මේකට පිළිතුර? බොහොම පහසුවෙන් කියන්නේ පුළුවන් 8 කියලා.. එත් මම කිව්වොත් 10 කියල. ටිකක් විශ්වාස කරන්න අමාරුයි.. එත් පුදුමය කියන්නේ මේ සංඛ්‍යා රටාවේ ඊළඟ පදය 8, 10 පමණක් නෙමේ.. ඕනෙම සංඛ්‍යාවක් වෙන්න පුළුවන්.. 
සංඛ්‍යා ලැයිස්තුවක මුල් පද කුමන පරිමිත ප්‍රමාණයකින් වුවද සංඛ්‍යා ලැයිස්තුවේ ඊළඟ පදය අනන්‍යව නිර්ණය නොවන නිසා ඊළඟ පදය ඔබ කැමති ඕනෑම සංඛ්‍යාවක් වන පරිදි ලියන්න පුළුවන්.. 
ඉහත සංඛ්‍යා රටාවේ ඊළඟ පදය 10 වන පරිදි බහු පදයක් හොයන විදිය දැන් බලමු.
2, 4, 6, __  කියන සංඛ්‍යා රටාවේ ඊළඟ පදය 8 කියල අපිට නිගමනය කරන්න පුළුවන් වුනේ එම රටාව නිරූපණය කරන බහු පදය '2n' බව උපකල්පනය කරපු නිසා.. නමුත් වෙනත් f(x) නම් බහු පදයක මුල් පද තුන 2, 4, 6 විය නොහැකිද? එම බහු පදයේ සිව්වන පදය 8 නොව වෙනත් සංඛ්‍යාවක් විය හැකිද? ඇත්තෙන්ම ඔව්.. අපි පහත සඳහන් බහුපදය සලකා බලමු.. 
මෙහි n = 1 විට පළමු පදය,
මෙහි n = 2 විට දෙවන පදය,
මෙහි n = 3 විට තුන්වන පදය,
මෙහි n = 4 විට සිව්වන පදය,
දැන් ඔබට මුල් පද තුන 2, 4, 6 සහ සිව්වන පදය 10 වන බහුපදය ලැබී අවසන්.. මේ ආකාරයට වූ බහුපද විශාල ප්‍රමාණයක් ලියන්න පුළුවන්.. මේ ඉන් එකක්.. දැන් අපි බලමු මේ බහුපදය ඉතා පහසුවෙන් ගොඩ නගා ගන්නා එක් ආකාරයක්.. 
f(n) = 2n + g(n) බහුපදය සලකමු.. මෙහි මුල් පද තුන 2n  මගින් ලැබෙන නිසා n = 1,2,3 විට g(n) ශුන්‍ය අගයක් ගත යුතුයි.. එබැවින් (n-1)(n-2)(n-3),  g(n) හි සාධක විය යුතුයි.. 
එවිට f(n) = 2n + c(n-1)(n-2)(n-3) නම් වූ බහුපදයෙහි මුල් පද තුන 2, 4, 6 බව තේරුම් ගැනීම ඉතා පහසුයි.. මින් පසු ඔබට අවශ්‍ය ඊළඟ පදය ලබා ගැනීමට කල යුත්තේ ඊට අදාල c නියතය සොයා ගැනීම පමණි. එය f(n) සඳහා ඔබට අවශ්‍ය ඊළඟ පදයද, n  සඳහා 4 ආදේශයෙන්ද පහසුවෙන් සොයා ගත හැකියි.. සිව්වන පදය 10 වීම සඳහා අවශ්‍ය c  අගය 1/3 බව ඉහත ආදේශයෙන් සොයා ගත හැකියි..
දැන් අපි බහුපදය සොයා අවසන්..
තවදුරටත් සුළු කිරීමෙන් පළමුව භාවිතා කල බහුපදය ලබාගැනීමට පුළුවන්.. 
මේ අනුව බලන කල ඕනෑම පරිමිත සංඛ්‍යා රටාවක ඊළඟ පදය ඕනෑම සංඛ්‍යාවක් විය හැකි බවත් එම සංඛ්‍යා රටාව සපුරාලන බහුපද විශාල ප්‍රමාණයක් ඇති බවත් මේ මගින් පැහැදිලි වෙනවා..
ඉතින් පුංචි කාලේ දෙන මේ වගේ සංඛ්‍යා රටාවකට ලබා දෙන ඕනෑම පිළිතුරක් නිවැරදි බව මේ විදියට ගණිතයෙන් ඔප්පු කරන්නත් පුළුවන්.. 
අවසන් වශයෙන් මෙවැනි ගණිතයේ ඇති සුන්දර දෑ ඉතා සරල බසින් ග්‍රන්තාරූඩ කරමින් ගණිතයේ ලස්සන මා හට අවබෝධ කරගැනීමට ඉවහල්වූ ආචාර්ය ඩබ්ලිව්. රාමසිංහ ගුරු පියාණන්ට මගේ හද බැති ප්‍රණාමය පුද කරමි.. 
එතුමා විසින් රචිත කෘති කිහිපයක්:
  • බින්දුවේ සිට අනන්තය දක්වා බිඳක් 
  • සංඛ්‍යාවක් පරිමේය වීමේ සම්භාවිතාව
  • ඊළඟ පදය 
  • අනන්තය සමග හෝරා දෙකක් 

Sunday, November 11, 2012

මිතුරු කැලක් සෙට් වුවා එක් දිනයක හොස්ටලයට
ඇති විය ලොකු කතා බහක් මේ ගැන ඔවුනොවුන් අතර

ආයුබොවන් ඔබ හැම හට විරිඳු සුරල් අසන අයට
සිතුන මෙමට පද පඳින්න මිහිරි විරිඳු සුරල් යසට
සිව් වසරක් ගෙවී ගියත් සරසවියෙන් තවම අපට
ඩිග්රී ගන්න බැරි උනාලු ගුරුවරු කල වර්ජනයට

මිතුරු කැලක් සෙට් වුවා එක් දිනයක හොස්ටලයට
ඇති විය ලොකු කතා බහක් මේ ගැන ඔවුනොවුන් අතර
එක එක අදහස් පළකර තර්ක කරයි හරි හරියට
පසකට වී බලන් උන්න මැදිහත් විනිසුරුවෙකු ලෙස

සරසවි වල ඇඳුරුතුමන් තවත් විටක සේවකයින්
කෙරුවා වැඩ වර්ජනයන් ඉටු කොට දෙන ලෙස ඉල්ලුම්
රටේ ඉන්න මොළ කරුවන් ලෙස පැමිණුන සරසවියට
දේශන නැති ශාලා වල කල් ගෙව්වා නිකමුන් ලෙස

සියයට හය ගැන ලොකුවට කතා කලත් මුල්කර ගෙන
තම පඩි නඩි වැඩිවෙනකොට නිමා  උනා වැඩ වර්ජන
තුන් මසකට නොඅඩු කලක් සිටියේ කටවල් වහගෙන
සෙතක් වේය කියා රටේ නිදහස් අධ්‍යාපනයට

පනස්දාහේ හැත්තදාහේ අනුදාහේ ලොකු පඩියට
යන්න නෑනෙ ඩිග්රි නැතුව රස්සා ලැබුනත් අපහට
ඉගනුම නොමිලේ හින්දා එරෙහි වන්න බෑ අපහට
දෙන දවසට ඩිග්රි අරන් යන්න වෙන්නෙ සද්ද නොකර

මෙහෙම ගියොත් මේ විදියට එන ඊළඟ පරපුර හට
නිදහස් අධ්‍යාපනයක් නැති වෙනවා උරුම වන්න
සල්ලි දීල ඉගෙන ගන්න තැන් ඇරෙනවා කිටි කිටියට
දුප්පතාගේ ඉගෙන ගත්තු දරුවට වෙයි හූල්ලන්න

අපි මේවට හඬ නැගුවම දොස් නගනවා හැම දෙනාම
ඉගෙන ගන්න ගිහිපු එවුන් කඩේ යනවා එක එකාට
හැම කෙනාම හඬ නගන්නේ තම වාසිය ගැන බලලයි
හැම දෙනාගේ වෙනස් වෙන්න ඕන එකම දෙය ඕකයි

හැම දෙනාගේ අවධානය සරසවි සිව් වසර දෙසයි
දහ තුන් වසරක් උගන්නෙ ඉස්කෝලෙත් නොමිලේ තමයි
කරුණු ගොඩක් එකතු උනා සංවාදය නැගල ගියා
අවසන් නිගමනය ගන්න සියලු දෙනා වෙහස උනා

මිනිසුන්ගේ ගති පැවතුම් වෙනස් වන්න ඕන හැඩයි
සියලු දෙනා වැඩ කරන්නේ තමන්ගේ වාසිය හිතලයි
රටේ නැගෙන හැම ප්‍රශ්නෙට මුල බිජේ මේක හැඩයි
සහයෝගෙන් වැඩ කෙරුවොත් මේ සිරිලක ලොව බබලයි

Wednesday, July 25, 2012

සේයාවක ආරම්භය

කාලෙකින් මොනවා හරි ලියන්න කියල හිතුන. මේ ටිකේ campus වහල තිබ්බට මොකද projects දෙකක වැඩ නිසා විවේකයක් නම් නෑ. ඒ අස්සේ  part time job කුත් කරනවනේ. ලඟදි අතට සල්ලි ටිකකුත් ලැබුන නිසා (GSoC), camera එකක් ගන්න කියල හිතුව. කාලෙක ඉඳන් තිබ්බ ආසාවක් තමා ඒ. ඡායාරූපකරණයට  ආසාව තිබ්බට camera එකක් ගන්න වත්කමක් තිබ්බේ නෑනේ. හැබැයි මිට කලින් දවසක ඔය කියන camera එකක් අත පත ගාන්න හම්බුනා. අපේ training කාලේ කට්ටියත් එක්ක බස් එකකුත් සෙට් කරගෙන ගියා බඹරකන්ද දිය ඇල්ල බලන්න. අපේ කොල්ලෙක් හිටිය ප්‍රසාද් කියල. ඔය වගේ cam එකක් ඒ කාලේ තිබ්බේ මිනිහට විතරද මන්ද. කොහොම හරි ඒක දැකල මම ඉල්ලා ගත්ත camera ඒක ට්‍රිප් එක ගිහින් එනකන් තිබ්බේ මං ගාව. ඔබන කෑලි බෑලි ටික එහෙන් මෙහෙන් අහගෙන හැම තැනම රිංග රිංග ෆොටෝස් ගත්ත. ගත්ත ගොඩක් ඒවා ඉතින් සාර්ථක උනේ නෑ. කොහොම හරි ටිකක් හරි හොඳයි කියල හිතෙන ටිකක් අරගත්තා. බලලම ඉන්නකෝ..









ඒ අතරේ මගේ ෆොටෝ එකක් ගන්නත් අමතක කරේ නෑ.. 

මගේම කියල camera එකක් ගත්තම තවත් ලිපියක් ලියන්නම්කො.. 
මත්තෙන් නික්ම යන්නට 
පුදන්නම් හද බැති 
ප්‍රසාද් සොයුරට
සහ මිතුරු කැල වෙත
සිනහවෙන් මා දිරි ගැන්වුව...

Saturday, May 5, 2012

බුදු ගුණ ගීත



කාලෙකින් තමා බ්ලොග් ලිපියකින් හමුවෙන්නෙ. බොහොම කාර්ය බහුල කාලයක් තමයි මේ ටිකේ ගෙවන්නෙ. සරසවියේ අවසන් වසරනේ. මේ වසරේ වෙසක් මංගල්‍යය යෙදිලා තිබ්බේ අපේ exam අස්සෙනේ. වෙසක් කියන්නේ exam හින්ද අමතක කරන්න බැරි දෙයක් නිසා වෙසක් එකට ගෙදර ඇවිල්ල කුඩුවක් එහෙම හදන්න ගත්ත. ඕක හදන ගමන් එකතු කරගෙන තිබ්බ බුදු ගුණ ගීත ටිකක් අහන්න ගත්ත. දැන් කාලේ ඉතින් බුදු ගුණ ගීයක් ඇහෙන්න වෙසක් පෝයක්ම එන්නම එපැයි.  කොහොම හරි ගීත ටික අහන ගමන් මට හිතුන මේ ගීත ටික එක්තැන් කරලා හැමෝම එක්ක බෙදා ගන්න ඕන කියල. 
මෙන්න මෙතනින් පුළුවන් ඔයාලට ඒ ගීත ටික බා ගන්න. තවත් ගීත ටිකක් ඉදිරියේදී එකතු කරන්නම්. දන්නවනේ ලංකාවේ upload speed එක ගැන. :D
මග ඇරුණු තවත් ගීත හුඟක් ඇති. ඒ ගැන පුංචි සටහනක් තියන්නකො. ඉදිරියේදී ඒවත් එකතු කරන්නම්. 

ඔබ සැමට බැතිබර, පින්බර වෙසක් මංගල්‍යයක් වේවා......